Blir stugugrisar- forhåndsomtale i Hallingdølen

B-karad’n inviterer til revy med lokale sleivspark, sjølvironiske innslag og kraftige herrestemmer. Laurdag er det premiere. Stein Torleif Bjella stb@hallingdolen.no Det nærmar seg revystart for B-karad’n. Det produktive mannskoret frå Ål ligg i hardtrening på Votnahall kor kveld fram til premieredagen. Dei lokkar med framsyninga «Frå Bekar til stugugris», med undertittel «Ein TV-kveld med B-karad’n». Då Hallingdølen var innom på øving var karane utstyrt med fulle kostyme. Det ljoma i tømmerveggene på ungdomshuset og karane var godt i gang med fi npussen. I tillegg til ei rad med ulike sketsjar, skal i alt 16 større og mindre innslag også visast på ein stor tv-skjerm som står bak på scenen Fått koppelam – Me har gjort mange snedige grep. Du kan få sjå Fjernsynskjøkenet med ein spektakulær sceneteknikk, seier Øystein Kilde. Han har fått på seg kjole og skaut og gjort seg klar for neste revyinnslag. Kilde fortel at den blinde kokken Ølvin Jær med sin døve medhjelpar kjem til å kokkelere både opp og ned i lokalet. Dessutan er den folkekjære serien Norge Rundt bytta ut med den noko meir lokale Votndalen Rundt. B-karad’n har fått med seg gjesteartistar frå nabobygde Leveld. Både Birger Bakkeplass og Marita Dokk deltek på revyen. – Dessutan har me fått oss koppelam. Stein-Ove Thon har gått gradene i koret og er no klar for solistoppgåver. Han har vist stor framgang på kort tid, seier Kilde høgtideleg. Var på TV B-Karad’n har oppnådd mykje sidan dei vart drege i gang for seks-sju år sidan. Mange hugsar nok framleis den førre revyen dei sette opp. Koret har også hatt mange oppdrag rundt om i landet. For to veker sidan var dei på TV2 under frukostsendinga. – Å vera med i B-karad’n er sosialt og hyggjeleg. Me deler interessa for sang og har opplevd mykje saman. Me har jo vore på tur til både Belgia, London og Brussel, forklarar Kilde.

Lovar moro: B-karad’n har eit variert revymateriale å lager. Øystein Kilde har fått på seg kjole. Nils Håkon Tveito til høgre. Gjesteartistar: B-Karad’n har fått med seg gjesteartistane Birger Bakkeplass og Marita Dokk. Smørsongarar: F.v. Stein-Ove Thon og Olbjørn Thoen. Lokale historier «Frå Bekar til stugugris» er fylt med lokale poeng, song og skodespel. Det blir heimevernshumor, rapport frå Pål Bang-Hansen og smøraktig svensktopp-kavalkade. Koret har øvd til revyen regelmessig sidan nyttår, men gått svanger med planane lenger. I eit par år har dei fi lma med tanke på innslag. Lars Inge Tverberg har vore dirigent i koret heile vegen og er ansvarleg for musikken. – Og primus motor har vore Nils-Håkon Tveito. Utan ein slik alt-mogeleg mann, songar og skodespelar ville det ikkje blitt revy, forklarar Kilde. Han reknar med at nokon vil kunne kjenne seg att i revyen. Instruktør i Hallingdal Teaterverkstad Gry Tøsdal har vore med dei siste vekene.